निष्ठा, समाजसेवा आणि सेवाभावाचा सन्मान; उत्कर्ष शेटे यांना ‘शिव-बसव प्रेरणा पुरस्कार’ जाहीर
३० वर्षांच्या सामाजिक, सांस्कृतिक व सेवाभावी कार्याची पोचपावती
बोल महाराष्ट्र न्यूज | विशेष प्रतिनिधी, अकलूज | अरुण गुजर
अकलूज : तीन दशकांहून अधिक काळ समाजकारण, कला, पत्रकारिता, सांस्कृतिक उपक्रम, कृषी क्षेत्र आणि सेवाभावी कार्याच्या माध्यमातून सामाजिक बांधिलकी जपणारे उत्कर्ष शेटे यांना सन २०२६ चा प्रतिष्ठेचा ‘शिव-बसव प्रेरणा पुरस्कार’ जाहीर झाला आहे.
सन १९९५ पासून उत्कर्ष शेटे यांनी विविध क्षेत्रांत आपल्या कार्याचा ठसा उमटवला आहे. कलेच्या माध्यमातून सामाजिक संवेदना व्यक्त करण्यापासून सुरू झालेला त्यांचा प्रवास पत्रकारिता, सांस्कृतिक चळवळ, समाजकारण आणि सेवाभावी उपक्रमांपर्यंत पोहोचला. स्वच्छता अभियान, गरजू व्यक्तींना मदत, वस्त्रवाटप, रक्तदान, वृक्षारोपण अशा विविध सामाजिक उपक्रमांत त्यांनी सहभाग घेत समाजाशी असलेली नाळ कायम जपली आहे.
शेती आणि मातीशी जिव्हाळ्याचे नाते
शेती आणि मातीशी असलेले नाते हे उत्कर्ष शेटे यांच्या व्यक्तिमत्त्वाचे आणखी एक महत्त्वाचे वैशिष्ट्य आहे. कृषी क्षेत्राशी जवळीक ठेवताना शेतकरी, ग्रामीण जीवन आणि सर्वसामान्यांच्या प्रश्नांशी असलेली त्यांची आत्मीयता त्यांच्या कार्यातून दिसून येते. समाजकारणाबरोबरच शेतीशी जोडलेली त्यांची भूमिका त्यांच्या व्यक्तिमत्त्वाला वेगळी ओळख देणारी आहे.
मोहिते-पाटील परिवारावरील निष्ठा ही विशेष ओळख
उत्कर्ष शेटे यांच्या सामाजिक आणि सार्वजनिक जीवनातील आणखी एक ठळक पैलू म्हणजे मोहिते-पाटील परिवारावरील त्यांची निष्ठा, प्रेम आणि जिव्हाळा. या परिवाराशी असलेले ऋणानुबंध त्यांनी सातत्याने जपले आहेत. विचारांशी आणि नात्यांशी प्रामाणिक राहून कार्य करण्याची त्यांची भूमिका त्यांच्या मित्रपरिवारात विशेष मानली जाते.
मोहिते-पाटील परिवारावरील प्रेम आणि निष्ठेमुळे त्यांच्या सार्वजनिक कार्याला सोलापूर जिल्ह्यात एक वेगळी ओळख निर्माण झाली आहे. शिक्षण प्रसारक मंडळ, अकलूज या संस्थेचे संचालक म्हणूनही ते जबाबदारी सांभाळत असून, शिक्षण क्षेत्राशी जोडलेली ही भूमिका त्यांच्या सामाजिक बांधिलकीला व्यापक स्वरूप देणारी ठरली आहे.
बसवविचारांच्या प्रसारासाठी पुढाकार
महात्मा बसवेश्वरांच्या समता, श्रमप्रतिष्ठा, कायक आणि दासोह या विचारांचा प्रसार करण्याच्या दिशेनेही उत्कर्ष शेटे यांनी पुढाकार घेतला आहे. ‘मूर्ती देव्हाऱ्यात, वचन मनात, कायक हातात आणि दासोह आचरणात’ या विचारातून सेवा, श्रम, समता आणि समाजहिताचा संदेश समाजापर्यंत पोहोचविण्याचा त्यांचा प्रयत्न सुरू आहे.
उत्कर्ष शेटे यांचा हा प्रवास केवळ एका पुरस्कारापुरता मर्यादित नाही. कला ते पत्रकारिता, पत्रकारिता ते समाजकारण, समाजकारणातून सेवाभाव आणि आता बसवविचारांच्या प्रसारापर्यंतचा त्यांचा प्रदीर्घ प्रवास त्यांच्या कार्याची व्यापकता अधोरेखित करणारा आहे.
मातीशी नाते, शेतीशी जिव्हाळा, समाजाशी बांधिलकी, शिक्षण क्षेत्रातील योगदान आणि मोहिते-पाटील परिवाराविषयीची निष्ठा व प्रेम जपत सातत्याने कार्यरत असलेल्या उत्कर्ष शेटे यांना सन २०२६ चा ‘शिव-बसव प्रेरणा पुरस्कार’ जाहीर झाल्याबद्दल मित्रपरिवार, सहकारी आणि समाजातील विविध स्तरांतून त्यांचे अभिनंदन होत आहे. पुरस्कार वितरणाची तारीख निश्चित झाल्यानंतर त्याबाबत स्वतंत्रपणे माहिती जाहीर करण्यात येणार आहे.
